And certaynly our language now used varyeth ferre from that whiche was used and spoken when I was borne... And that comyn Englysshe that is spoken in one shyre varyeth from a nother. In so moche that in my dayes happened that certayn marchauntes were in a shippe to Tamyse for to have sayled over the see into Zelande, and for lacke of wynde thei taryed atte forlond, and wente to lande for to refreshe them. And on of theym named Sheffelde, a mercer, came in to an hows and axed for mete, and specyally he axyd after `eggys'. And the good wyf answerde that she coude speke no Frenshe. And the marchaunt was angry, for he also coude speke no Frenshe, but wold have hadde egges, and she understode hym not. And thenne at last a nother sayd that he wolde have `eyren'. Then the good wyf sayd that she understod hym wel. Loo! What sholde a man in thyse dayes now wryte, `egges' or `eyren'? Certaynly, it is harde to playse every man by cause of dyversite & chaunge of langage. -- William Caxton, preface to "Eneydos".